STARgal

Levamos o premio de innovación en dinamización lingüística deste ano 2016/16, e o noso Departamento estivo moi implicado na actividade.

O martes 10 de maio propoñemos a todos os centros de secundaria de Galicia competirmos xuntos no #STARgal: un proxecto elaborado no IES A Cachada, Boiro, para demostrar que as TIC e o galego poden e deben ir da man se queremos construír unha sociedade máis sólida e preparada.

A competición será virtual e consistirá en 2 probas:

  • RañaSTARgal, unha competición de habilidade e coñecementos a través de videoxogos elaborados polo noso alumnado con Scratch
  • OlloSTARgal, un concurso de videopoemas elaborados con móbil, organizado en colaboración co Festival Audiovisual Escolar Olloboi
Entra en cada pestana para saber máis sobre como funcionará cada competición e os premios correspondentes.
Entre tod@s, podemos frenar o retroceso do galego. O primeiro paso é reivindicar o seu uso nas áreas de prestixio laboral e social actuais: o audiovisual, a robótica e a programación.
Esta actividade conta co apoio económico da Xunta de Galicia, a través das axudas a Innovación en Dinamización Lingüística

Concurso EEI de Mbot

Participamos este ano por primeira vez no concurso que organiza a Escola de Enxeñería Industrial de Vigo con Mbots. Estamos moi contentas, porque nunca programáramos Mblock, e foinos bastante ben nas 2 probas!

Deixámosvos unha galería de imaxes da actividade, á cal acudimos co alumnado do Contrato-Programa STARcach:

Concurso LEGO

Este ano tivemos dobre premio: o concurso tivo fase eliminatoria (22 de abril) entre a zona Norte (Coruña e Lugo) e a Sur (Pontevedra e Ourense), e tras unha brillante actuación de todo o noso alumnado, un grupo clasificouse para a final: Izan, Adrián, Carlos e Diego.

Para maior alegría, o martes 26 gañamos o 1º premio!! o cal nos puxo, imaxinade, recontentísimas. Déronnos un flamante LEGO EV3, que estamos aprendendo a programar. Esta foi a nova na Voz de Galicia, e aquí unhas fotos:

Charla sobre Nanotecnoloxía

No marco das charlas que ofrece a USC, hoxe veu ó noso insti Fran Fraga, profesor do Laboratorio de Física Aplicada do Campus de Lugo.

Fran ofreceunos unha interesantísima charla sobre diversas aplicacións da nanotecnoloxía:

  • No campo da electrónica, os nanotubos de carbono e os nanoalambres ofrecen posibilidades de supercondución a escalas reducidísmas, o que prognostica unha revolución na fabricación de equipos eléctricos e electrónicos, na reparación de circuítos integrados, na fabricación de ordenadores nanocuánticos con abraiante velocidade de procesamento de datos… A fibra nanoóptica, por outra parte, permitirá velocidades de descarga de datos de ata 10 000 Mbps
  • A posibilidade de xerar correntes eléctricas con combinacións de nanopartículas de ouro permite producir pinturas que, revestindo unha edificación, producirían a enerxía eléctrica que consumirían as instalacións das vivendas. Se ben polo de agora falamos de milleiros de euros por metro cadrado, estanse a reducir os custos sensiblemente, o que atraeu o interese de compañías como Fenosa.
  • No eido dos materiais, presenciaremos unha auténtica revolución coas nanoestruturas: vehículos irrompibles, chalecos antibalas lixeiros e impenetrables, tecidos formados por nanofibras con resistencias elevadísimas… Na cosmética tamén terán impacto os novos materiais, aparecendo fullerenos e hidroxeles que melloren a estética e complementos sanitarios que utilizamos.
  • Unha das áreas onde máis impactante será a evolución da nanotecnoloxía é na bioloxía e na medicina: fabricaranse medicamentos ad hoc, inseridos por nanoagullas no organismo, e capaces de actuar só onde sexan precisos e durante o tempo que sexan precisos (dendrímeros), o que mellorará sensiblemente doenzas como o cancro ou as úlceras; repararanse conexións neuronais e celulares, reducindo a incidencia de alzheimers e parálises; fabricaranse próteses compatibles 100% cos tecidos humanos (lentillas, órganos, ósos, dentes). A non moito tardar, veremos como ó nacer se nos implanta un chip que detecte calquera anomalía no ADN (quantum dots) ou nos procesos biolóxicos e dea unha alerta ós sistemas de saúde en caso de ser preciso.

20160407_124306

Lanzados cara o concurso da EEI

O vindeiro martes 19 de abril, o alumnado que está no proxecto STAR Cach acudirá a Vigo, á Escola de Enxeñería, a participar nun concurso con Mbots. Terán que realizar 2 probas: unha competición de velocidade seguindo liñas e unha loita tipo sumo con robots doutros grupos. Estamos entrenando!

20160405_141637

Os nosos proxectos na computadora

Estes días estamos vendo, en 2º e 3º, os fundamentos do uso da informática para elaborar proxectos. Cómpre reparar nas seguintes consideracións:

  1. Existen sistemas operativos e softwares abertos e pechados, e responden a 2 filosofías ben diferentes: vos elixides cal é a vosa!
  2. Se escolledes traballar coa suite ofimática online Drive, sabede que estades ante un software gratuíto pero non aberto: non pagades por el pero non tedes o control do que facedes, nin podedes acceder ou modificar o código. Deste xeito, toda a información que metades na aplicación (Google) será utilizada para o que eles estimen oportuno (maiormente, publicidade)
  3. Non podedes usar imaxes, vídeos nin audios que non sexan da vosa propiedade ou reutilizables! O material aberto ó seu uso é o coñecido como Copy Left, e sempre temos que citar ó autor. A axencia máis recoñecida de material copy left é Creative Commons (CC), e recoñécese polo seu logo. Todos podemos subir vídeos e imaxes con esa imaxe, e así permitir que outros as usen. 
  4. Hai unha morea de páxinas para obter imaxes, vídeos e cancións CC, investigade. Particularmente, en Goolge Imaxes poden seleccionarse a través de “Máis ferramentas, etiquetadas para reutilización”, e en Youtube a través de “Filtros, características, Creative Commons”.
  5. Facer unha presentación, finalmente, non debe ser como pegar apuntes nun documento. Hai que preparar moito o que se vai dicir, ter claro qué imos transmitir. Introducir o tema, explicalo ben, e logo concluílo. Usar moitas diapositivas con pouca e clara información en cada unha. Tipografías, cores e imaxes claras. Na seguinte presentación tedes unhas claras instrucións de qué facer e qué non facer!

Portas de garaxe automatizadas

En 2º estamos traballando con mecanismos e electricidade para fabricar maquetas de portas que se abren automaticamente. A idea é utilizar un mecanismo de parafuso sen fin ou piñón-cremalleira, un circuíto con cambio de xiro e, os grupo avanzados, fins de carreira:

cambioxiroconfindecarreira

 

Aquí tedes algunha das maquetas construídas polo alumnado: